Merci viu Mau, Ruedi

Liebe Ruedi,
Im Name vom EHC-Heimbärg möchte mir dir ganz härzlech für di unermüedleche Isatz, dis Engagement und all dini gleischteti Püetz i de letschte meh aus 30. Jahr, danke.
Mir wärde di sehr vermisse u fröienis aber o druf, dass du dr EHC witerhin no im Hingergrund ungerstützisch.
Ä längi Ära geit z'änd. Dr EHC-Heimbärg ohni di, cha me sech gar nid vorsteue. Du bisch über Jahre z'Gsicht, die gueti Fee u d'Seel gsi vo dämm Verein. Vili Spiler hesch gseh cho u gseh ga u doch, hesch immer aui so gno wie si si. Du bisch immer voll derby gsi u hesch öppe z'eint oder anger Mau schlächt gschlafe nach em ne schwache Spiu vo 'dine' Giele.
Es isch fasch nid i Wort z'fasse, was du für dä Verein aus gmacht hesch. Di Nachfolger wirds sicher schwär ha, i dini groooosse Fuesstapfe z'trätte, aber mit dire Ungerstützig wird das sicher o glinge.
Mir aui wünsche dir nume z'Bestä für di kommendi Zyt u hoffe natürlech, dass du öppe die ar Bande oder uf dr Tribühni azträffe bisch.
Merci für...
- dass du immer für dä Verein da gsy bisch
- Vili Stunde i Sitzige vo diverse Verbänd
- Vili tuusig Site HV-Protokoll wot ad Mitglider verschickt hesch
- z'Leite vo über 30. Houptversammlige
- di unermüedlech Isatz
- d'Vorstandssitzige bi dir dehei, wos de geng no es Apero gä het
- z'Organisiere vo Vereins-Aläss
- dis Mitwürke ir Nachwuchsbewegig bi de Huskys
- aues wo vergässe isch gange i derä Liste